حراس الحضارة حراس الحضارة

آخر الأخبار

random
جاري التحميل ...
random

تمثالي الأمير رع حتب والأميرة نفرت

بقلم الآثارى عمر السنهوتى 
تمثالي الأمير رع حتب والأميرة نفرت
النهاردة هنتناول موضوع مميز وجميل جداا عن أجمل تمثالين في المتحف المصري وهما تمثالي الأمير رع حتب والأميرة نفرت هنعرف إيه حكايتهم وهنتعرف على مميزات التمثالين وجميع ألقابهم اللي مكتوبة باللغة المصرية القديمة (الخط الهيروغليفي) على الكراسي اللي قاعدين عليها وأول حاجة لازم نعرفها:

من هو الأمير رع حتب؟
البعض قال أن الأمير رع حتب هو إبن الملك سنفرو (أول ملوك الأسرة 4) من زوجة ثانوية (غير شرعية أو غير رسمية) والدكتور زاهي حواس إقترح أن رع حتب ربما يكون إبن الملك حوني (آخر ملوك الأسرة 3) 
ولو سلّمنا بالرأي الأول نقدر نقول أنه أخ غير شقيق للملك خوفو .. 
وربما يكون أخوه الكبير هو الأمير نفر ماعت (وزير الملك سنفرو) ونفر ماعت أول واحد ياخد لقب (ثاتي) بمعنى وزير.

وأخوه الصغير هو رع نفر اللي أخد لقب (إمي إر جد سنفرو) بمعنى (المشرف على جد-سنفرو) وجد سنفرو هو الأسم القديم لمنطقة ميدوم قديما وتعني (فليبقى أو فليثبت سنفرو) 
وللأسف (نفر ماعت - رع حتب - رع نفر) ماتوا قبل ما سنفرو يموت فبالتالي أول ما سنفرو إتكل على الله خوفو مسك الحكم على طول وبقى تاني ملوك الأسرة الرابعة 

(رع حتب) يعني >>> (رع راضي) أو (رع مطمئن) أو (رع مرتاح البال)

تم إكتشاف مقبرته في ميدوم (بني سويف حاليا) عام 1871 م بواسطة العالم الفرنسي أوجست مارييت وقصة إكتشافهم جميلة جداا وهي أن العمال لما فتحوا المقبرة ضوء الشمس دخلها وسقط على عيون التماثيل المطعمة بالإحجار الكريمة فبالتالي إنعكس وبانت أن العيون حقيقية فلما العمال شافوا المنظر ده إفتكروا أن الروح دبت فيهم وصحيوا تاني علشان يحموا مقبرتهم فإترعبوا وطلعوا يجروا وده بيدل على مدى إتقان ودقة المصري القديم في صنع التماثيل سبحان الله بيصنع التمثال جميل وبيحطوا في حتة مميزة في المقبرة بحيث أن لو الضوء سقط عليه يبان أنه حقيقي فبالتالي ده بيعتبر عنصر تأمين للمقبرة

زوجته إسمها (نفرت) بمعنى الجميلة واللي أخدت لقب (رخت نسو نفرت) 
واللقب ده ليه معنيين:

المعنى الأول معنى حرفي وهو المعروفة لدى الملك نفرت أو الجميلة المعروفة لدى الملك

والمعنى التاني إصطلاحي وهو النبيلة نفرت لأن لقب رخت نسو ده كان مقتصر على الأميرات والنبيلات فقط

واللقب ده بنشوفه على ضهر الكرسي بتاع تمثال نفرت مكتوب باللون الأسود بالخط الهيروغليفي

ونفرت أسرتها غير معروفة (مقطوعة من شجرة يعني)

أول ما رع حتب ونفرت إتجوزوا خلّفوا 3 ولاد و 3 بنات

الولاد إسمهم (جدي - إتو - نفر كاو)

والبنات إسمهم (مررت - نجم إيب - ستت)

وبنلاقيهم مذكورين في نقوش مقبرته برضه

لو جينا بصينا للتمثالين هنلاقيهم مصنوعين من الحجر الجيري الملون وإرتفاع تمثال رع حتب 121 سم وإرتفاع تمثال نفرت 122 سم (بيكرّمها بــ 1 سم =D ده الراجل ده كريم جدااا)

أولا تمثال رع حتب:
بيمثله وهو جالس على كرسي لونه أبيض ذات مسند ضهر مرتفع مكتوب عليه إسمه وألقابه باللون الأسود ولابس نقبة قصيرة لونها أبيض ولون جسمه بني محمر لأنه كان بياخد لقب (إمي إر مشع) واللي بيعني قائد الجيش فبالتالي بيخرج في حملات عسكرية كتييييير وبيتعرض للشمس كتييييير فلازم جسمه يبقى كدة (محمص زي ما إحنا شايفيين)

وبيحط دراعه اليمين على صدره من الناحية الشمال (اللي هي ناحية القلب) وماسك في إيده الشمال لفافة المكس اللي كانت بتصنع من البردي أو الجلد لإستخدامها كبطاقة هوية للدخول للعالم الآخر ولو نلاحظه برضه بنلاقييه لابس تميمة الــ (إيب) يعني تميمة القلب فبالتالي ده بيعكس أهمية القلب في مصر القديمة لأنه طبقا لنظرية الخلق في منف تم خلق الكون بواسطة المعبود بتاح عن طريق الفكر والكلمة أو القلب واللسان فبالتالي القلب له علاقة بعملية الخلق

وكمان القلب ليييه أهمية كبيرة جدا عند المصري القديم لأنه في محكمة الموتى بيتم وضعه على الميزان أمام ريشة الماعت (الحق والصدق والعدالة والنظام) فلو كانت أعمال القلب صالحة هيدخل الجنة اللي إسمها عند المصري القديم (حقول الأيارو) واللي كانت في نظره حدائق وجناين وزرع وأماكن خضراء ولو كانت أعماله سيئة  هيبتلعه حيوان العمعم .. 
وبعدين بيدخل النار اللي هي في نظره كانت حر وعطش وجوع وضلمة 

وعلى فكرة لفظ العمعم ده هو اللي جت منه كلمة عم يعني يبتلع اللي بنقولها في لغاتنا العامية .. 
ولو بصينا لوشه هنلاقيه متصور بالملامح الشخصية الواقعية .. 
بشعره الطبيعي وعيونه المطعمة وشنب أسود (وده من التماثيل القليلة اللي بتظهر فيها الشارب أو الشنب)

ونلاحظ أن الفنان مش مهتم بالإطراف (أصابع الأيدي والقدمين) على عكس الوجه مهتم بيه إهتمام كبيييييير جدااا وده لأن الوجه هو اللي من خلاله بتتعرف الروح على الجسد

وعلى الكرسي اللي قاعد عليه رع حتب بنلاقي إسمه وألقابه على النحو التالي:
من ناحية كتفه الشمال:

1 - (ور مــا آه إيونو) بمعني كبير رائيين إيونو أو كبير كهنة إيونو (هليوبوليس - عين شمس حاليا)

2 - (وع ورو سح) بمعني الشخص المبجل من القاعة (القصر) أو الشخص رفيع المكانة من عظماء القاعة

3 - (مجح آمس) بمعنى حارس أو حامل صولجان الآمس (أحد الرموز والتمائم الدالة على السلطة في مصر القديمة)

4 - (سمسو إيست) بمعنى كبير القصر

5 - (وع ورش شبنـتيو) بمعنى الشخص المبجل / الأعظم لسقاة الملك

6 - (سا نسو إن غت إف رع حتب) بمعنى إبن الملك من صلبه أو من جسده رع حتب

من ناحية كتفه اليمين :

1 - (ور إن بي) بمعنى عظيم مدينة بوتو (تسمى حاليا تل الفراعين قرب مدينة دسوق في شمال الدلتا)

2 - (إمي را مسثتيو) بمعنى المشرف على النقالين (اللي هما الشياليين يعني =D)

3 - (إمي را مشع) بمعنى المشرف على الجيش أو قائد الجيش

4 - (خِرِب تما) بمعنى المشرف على أو قائد سلاح الرماة

5 - (سا نسو إن غت إف رع حتب) بمعنى إبن الملك من صلبه أو من جسده رع حتب

ثانيا تمثال نفرت:
كلمة نفرت تعني الجميلة

التمثال بيصورها وهي جالسة على كرسي لونه أبيض ذات مسند ضهر مرتفع مكتوب عليه إسمها وألقابها باللون الأسود ولابسة عباية ضيقة لونها أبيض ولون جسمها أبيض كريمي لأنها كانت بتقعد في بيتها معززة مكرمة بتقوم بالأعمال الخفيفة فبالتالي مش بتتعرض للشمس زي رع حتب اللي مهدود حيل أهله طول السنة في الحروب والحملات العسكرية .. فبالتالي لونها أبيض كريمي وعامة المرأة في مصر القديمة كانت واخدة حقها تالت ومتلت وده بينعكس من خلال لقبها (نبت بر) بمعنى سيدة المنزل ولقب تاني إسمه (سنت) بمعنى الأخت يعني معنى كدة أن الزوج كان بيعتبر زوجته كأنها أخته (كان رومانسي أووووي)

وبتضع إيديها اليمين على الشمال اللي بتظهر من أسفل العباية في وضع متقاطع قريب جدا من الوضع الأوزيري 
ولابسة باروكة شعر كثيفة سوداء بيظهر من تحتها شعرها الأصلي .. 
وطبعا بيزين الباروكة تاج على شكل زهرات الروزتا والهدف منها أنها تضيء عالم الأموات وترتبط بعبادة الشمس لأن شكلها دائري نفس شكل الشمس

وترتدي أيضا قلادة الأوسخ (يعني القلادة الواسعة) واللي كانت من أشهر أنواع الحلي عند المصري القديم سواء للرجل أو المرأة واللي كان ليها غرضين:

* غرض ديني : تعطي الحياة بعد الموت لمن يرتديها

* غرض دنيوي : الزينة والحماية من الأرواح الشريرة والأمراض

وعلى الكرسي اللي قاعدة عليه نفرت بنلاقي إسمها وألقابها على النحو التالي :

من ناحية كتفها اليمين والشمال:

* (رخت نسو نفرت) بمعنى المعروفة لدى الملك نفرت (الجميلة)

أتمنى أن الموضوع يكون عجبكوا وإنتظروا مزيد من الموضوعات الشيقة عن مصر وحضارتها العظيمة الشامخة التي أفتكر بها دائما وأبداً

عن الكاتب

Admin Admin

التعليقات



إذا أعجبك محتوى موقعنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد الموقع ليصلك جديدنا أولاً بأول ، ويمكنك إرسال رساله بالضغط على الزر المجاور ...

إتصل بنا

جوجل بلاس

المتابعون

فيس بوك

جميع الحقوق محفوظة

حراس الحضارة

2016