حراس الحضارة حراس الحضارة

آخر الأخبار

random
جاري التحميل ...
random

الدين والأحداث التاريخية والحكم للقارئ

مشكلة بين الآثاريين حدثت بعدما قام الآثارى عمر السنهوتى أول أمس بمشاركة معلوماته التاريخية كعادته الشبه يومية والتى تفيد العديد من القراء ومتابعيه على عدد من الجروبات الآثارية المتخصصة فى علم المصريات بموقع التواصل الإجتماعى الفيس بوك .. إلا أنه تفاجئ بسلوك إعتبره الآثارى عمر السنهوتى سلوكاً عدوانياً وذلك من أحد الأدمنز بأحد الجروبات الأثرية .. والذى تكشف فى نظر السنهوتى عن غيرة ثقافية تعصف بأى فكر حوارى متحضر فى المناقشات وتبادل المعلومات .. ولذا قمنا كموقع حراس الحضارة بنشر الأحداث التى جرت لكم بمنظور حيادى .. إيماناً منا بأن الحكم فى نهاية الأمر للقارئ:
ما كتبه عمر السنهوتى نصاً على صفحته الشخصية الفيس بوك
لمَّا نزِّلت بوست فرعون موسىَ وقُلت أنه مش معروف حتىَ الآن .. نشرته على جروب والأدمن بتاعه الشخص اللي رافعلي كارت أحمر في الصورة ده .. طبعاً أنا قُلت في البوست أن الإسلام هو أسرع دين بينتشر على وجه الأرض وأن هيجي يوم والعالم كله هيبقى مُسلِم (ودي حقيقة مؤكدة) يجي واحِد زي ده مش عارف أوصفه بإيه غير أنه غير مُتحضِر وليس له قيمة ويكتبلي الجُملتين دول ويمسحني من الجروب .. 
طبعاً أنا مش فارقة معايا حاجة مِن دي لأني ممكن أعمل أحسن منه مليون ألف مرة .. ولأن أبويا ربَّاني وعلمني إزاي أخاطِب الحمقىَ .. فبالتالي أنا أكبر مِن أني أغلط في واحد زي ده .. 
طول ما فيه ناس زي دي عُمرنا ما هنتقدم خالِص .. المُصيبة أنك تشوف واحِد زي ده المُفترض أنه مُسلِم ويعترض على أن الإسلام هو أكتر دين بينتشر في العالم يبقى المطلوب مِننا نكون مُلحدين علشان نرضيهم ؟ !! كلام غير منطقي أنك كمُسلِم تنكِر حقيقة هتحصل بكيفك أو غصب عنك لمُجرد أنك بتجامِل ناس مُتخلفين .. خليهم بقى ينفعوك يوم القيامة لما تُقف قُدَّام ربنا .. ربنا يهديك ويهدي اللي زيك .. وعموما اختتم حديثس بأن الأدب فضلوه عن العلم.
جانب من ردود متابعيه:
Mohamed Bedo
انت انسان محترم ومتحضر يا عمر
Ali Basha
استمر صديقي الغالي ودعك من الحاقدين ..
 استمر بالبحث في هذا العلم الرائع ولا تلتفت لأي أحد ما دمت على الطريق السليم
احمد دوله
واذا خاطبهم الجاهلون قالو سلاما
Mohamed Bedo
يا اخى كل اناء ينزح بما فيه .. 
وكما قال رسولنا الكريم خير الرد علي الاحمق السكات .. 
ﻻتاخذ في بالك ياصديقي واكمل مسيرتك العلميه لكي نتعلم منك التاريخ
محمد محمود
متركزش اوي مع الناس ده 
و لو على الجروبات عندك يابا جروب مجلس النور انشر فيه و هتلاقي مناقشات كتيرة و انا كنت عاوز اناقشك في المسئلة ده بس ملحوقة ان شاء الله

ثم جانب من حسابات وهمية لمهاجمة الباحث

ومن ردود الجانب الآخر
Mohamed Medhat
لو سمحت لي يا عمر بالمشاركة معاك, أنت شاب ذكي ومجتهد ومخلص جدا لعلم الاثار بس لازم نقول الاستاذ محمد بكير -وسنه أكبر كمان من والدك- رجل محترم ومثقف جدا وعيب يا عم عمر لما تقول عليه كلام مش كويس والجروب بتاعه له دور تنويري كبير وهو والد الشهيد زياد بكير الفنان التشكيلي الذي استشهد يوم 29 يناير اثناء دفاعه عن المتحف المصري, المهم أنا عايز أقولك علي حاجة من حيث المنهج, أخطر حاجة يقع فيها باحث آثاري هي الدخول في معضلة من هو فرعون الخروج ؟ومن هو فرعون يوسف الصديق؟, الموضوع مش محسوم ولا يوجد أدلة, وانت راجل خريج كلية اثار وعارف ان الكلمة عندنا بتتوزن بميزان الذهب لو قلت حاجة لازم تستند لمرجع وأدلة اثرية مش افتراضات, ومصر للأسف الوعي الاثري فيها ضعيف فبالتالي طول مانت كاثاري تشارك بدور قوي بنشر الوعي الاثري الناس كتفقد اهتمامها بقصة من هو فرعون موسي لانهم هيعرفوا ان التاريخ المصري مداه الزمني كبير جدا , العالم كله بيتكلم عن نبوغ قدماء المصريين في الطب والهندسة والفلسفة واحنا كمصريين اسيبين كل ده ولا نلتفت له ورايحين نتكلم في جزئيات هامشبة

ثانيا انا رجل مسلم زيك لكن ايه فائدة اني بكتب في جروب أثري بنتكلم كلام علمي بحت في الاثار وانت يا عمر بتقول الإسلام أسرع الاديان انتشارا وسيسودالعالم, انا كمسلم قد أقبل منك هذا البوست في جروب إسلامي أو دعوي, لكن في جروب اثاري, انت ممكن تعمل فتنة يحصل ايه ساعتها لو حد غير مسلم قالك الكلام ده غير صحيح وديانته هي اللي ستسود ساتها هتحصل فتنة في الجروب وخلاص كل واحد هينحاز لدينه, حط نفسك في الطرف التاني لو حد كتب المسيحية أو اليهودية هيسودا العالم والاسلام هيتلاشي أنت كمسلم هيكون رد فعلك ايه, حتي لو انت قناعتك كده لكل مقام مقال, عايز دليل علي كلامي لو تعرف تخش علي الجروب وشوف كمية الفتنة اللي حصلت مابين المسلمين وغير المسلمين بسبب البوست بتاعك هتعرف قد ايه خطورة ما فعلت, تديين علم الاثار كارثة ومصيبة يا عمر !! التبشير بانتشار الاسلام مش دورك ولا رسالتك كآثاري انت دورك التعريف بتاريخ مصر فقط مش التبشير عايز تعمل كده علي صفحتك الشخصية حقك عبر عن رأيك, لكن في صفحة المصريات اسمحلي أقولك ده ولا علم آثار ولا يمت للعلم أساسا

الحاجة الأخيرة عالم الاثار مش دوره إثبات صحة النصوص الدينية أو تأكيد ما ورد فيها احنا كمسلمين مؤمنين بقصة سيدنا موسي لكن كآثاري مش مهمتي نشر الدين عبر علم الاثار او استغلال بعض الايات هنا أو هناك للاشارة إلي فرعون بعينه بإنه فرعون موسي, انت كاثاري يجب ان تتعامل بحيادية انت لست رجل دين ولا واعظ ولا داعية, وكون أن بعض الناس قد شطح تفكيرهم وظنوا مثلا انك تحب الديانة المصرية فهذا جهلا منهم وفي المقابل مش لازم تظهر لهم إنك متدين وورع لأن الايمان ده ربنا وحده مطلع عليه مش لازم تثبت حاجة حد وماتغيرش من أسلوبك عشان في بعض الجهلاء وقليلي العقل ظنوا بك الظنون

Omar Elsanhoty
أهلاً وسهلاً بحضرتك أُستاذي العزيز في صفحتي .. 
إحترامي الكامِل لجميع الناس سواء له علاقة بعلم المصريات أو لا .. 
عندما نشرت كلام وقُلت فيه أن الأسلام سينتشر وسيسود العالم فهذا حقي في التعبير عن رأيي بكُل حُرية ما دُمت لا أغضب الله سُبحانه وتعالىَ .. 
أما بقى غير المُسلم اللي حضرتك بتتكلم عنه لما يشوف بوست زي ده ومعجبوش ممكن يتجاهله أو لما يعلق تعليق يبقى مُحترم ومؤدب لأن اللي هو مؤمن به اللي هو المسيحية بيأمره بالسلام ونبذ العُنف وتقبل الرأي والرأي الآخَر

وبعدين ده مش كلامي أن الأسلام هينتشر بسرعة أمثال (فيلي بوتولو) و (ميجيل بيرو) و (فانسان مونتيه "صاحب كتاب الإرهاب الصهيوني") 
وغيرهم وغيرهم
ولو حد مِنهم كتب أن المسيحية أو اليهودية ستسود العالم أنا شخصياً مش هعترض على كلامه بأسلوب همجي لكن عندي الحُجة اللي هجادل بِها وبأدية علمية ومن القُرآن الكريم " دستور المُسلمين " وعُمري ما هقوله " إنت كداب إنت كذة وكذة وكذة " عُمر عمره ما يطلع منه الكلام الهمجي ومُهاجمة الناس بالباطِل بالطريقة دي 

المفروض يبقى عندنا روح إسمها تسامُح وإحنا زي ما بنتقبل الناس اللي منهم بيهاجموا الإسلام ليل نهار وللأسف كتييير مننا ساكِت لازم هُما كمان يتقبلوا آرائنا اللي هي مش فيها مُهاجمة لدين أصلاً لكننا بنعمل بقول ربنا (ادع الى سبيل ربك بالحكمة والموعظة الحسنة وجادلهم بالتي هي أحسن إن ربك هو أعلم بمن ضل عن سبيله وهو أعلم بالمُهتدين) 
فبالتالي ده مبدأي الرئيسي في أي مُناقشة وبعدين فتنة إيه اللي أنا عملتها ؟؟!!

وأحب أسأل حضرتك سؤال (هو إحنا ليه بندرس علم الآثار) 
بما إنك بتقول تديين علم الآثار غلط ؟؟!!

وكلمة أخيرة أنا لم أدَّعي أني رجل دين أو واعَظ .. 
لكني مُسلِم مُحِب لجميع الأديان وأُحِب التسامُح وإعطاء الفُرصة لأي شخص للتعبير عن رأييه .. 
ربنا سُبحانه وتعالى بيخاطِب أمة سيدنا مُحمد صلى الله عليه وسلم وبيقول جل جلاله في سورة آل عمران الأية 110 (كنتم خير أمة أخرجت للناس تأمرون بالمعروف وتنهون عن المنكر وتؤمنون بالله ولو آمن أهل الكتاب لكان خيرا لهم منهم المؤمنون وأكثرهم الفاسقون) 

فيجب عليك كمُسلِم أنك تأمُر بالمعروف وتنهي عن المُنكر ولا تخشىَ قول الحق أمام أي إنسان 
لأنه في النِهاية إنسان وإحنا الحمد لله كمُسلمين لا نخشىَ البشر بل نخشىَ الله .. 
تحيااااااااتي لحضرتك وآسف على الإطالة
Mohamed Medhat
صباح الخير يا عمر الاول قبل كل شئ, انا قلتلك في أخر مشاركة لكل مقال مقال لو انت عايز تقول ان الاسلام هينتشر قول ده في صفحتك الشصخية أو في جروب إسلامي دعوي, لان لكل مقام مقال, لما تكون في مؤتمر علمي أو ندوة علمية لا يجب التطرق للأديان لأنك أول بتكلم ناس من ثقافات وأديان مختلفة وثانية ليه أعمل فتنة طائفية والطرف التاني يتشنج وفي الاخر تحصل خناقة, طيب في النتيجة يا عمر ايه الاستفادة اللي انت والناس استفادوها, دي شحنة عاطفية دينية مش حقائق, والاسلام قوته لما يكون اقتصادنا قوي وعندنا نهضة علمية مش أمة متخلفة مريضة عايشة علي إعانات وتكنلوجيا الغرب واليابان والصين !!! لا بارك الله في كثرة ضعيفة والمسلمون الاوائل كانوا قلة بالعكس ده انت لما تقرا الغزوات النبوية دائما المسلمين كاناو الاقل عدد ولما فرحوا بالكثرة يوم غزوة حنين انهزموا, المهم ده مش موضوعنا ثانيا يا عمر علم الاثار اللي انا اتعلمته في تعريفاته المنهجية مفيهوش خالص استخلاص العبر ومافيهوش دعوة خالص بالدين ومفيش أسهل يا عمر اني أكتب لك كام تعريف أكاديمي لعلم الاثار عشان ماتقلش عليا باستعرض ثقافتي وعامل فيها موسوعي.

وحاجة تانية يا عمر عايز أقولهالك أي اثاري لابد له من منهج علمي كل الاثاريين العظماء زي جاردنر بيتري شامبليون رايزنر موللر وغيرهم كانوا ماشيين علي منهج علمي صارم, انت كاثاري كتتعامل مع ناس كتير جدا , عارف لو انت في يوم كتبت مقالات زي بتاعة موسي دي أخرها هتتنشر في مجلة التوحيد أو مجلة الأزهر ومستحيل دورية علمية محترمة هتنشرها, لان زي ماقلت لك صاحب بالين كداب لا تكون اثاري أو تكون واعظ انت مش دورك نشر الإسلام ولا الدين يا عمر, ولما تحب تنشر الدعوة ماتستغلش الاثار والتاريخ.

Omar Elsanhoty
وبعدين العُلماء الأوائِل اللي حضرتك بتتكلم عنهم أمثال جاردنر وموللر وويليم ماثيو فلندرز بتري .... إلخ كانوا غير مُسلمين ويؤمنون بالمادية أكثر من أي شيء

وفي المُقابِل أنا مُسلم (أؤمن بوجود الأله من غير ما آراه فبالتالي عمر ما هيكون تفكيري ودماغي زي تفكيرهم) لأن تفكيرهم محدود بالمادية فقط لكن في الإسلام ربنا أنعم علينا بالقُرآن اللي بنكتشف في كل يوم أنه صحيح فيما ذكره مِن أحداث عن الأُمم السابِقة وأؤكد دائِماً أن الإسلام سيسود العالم.

Mohamed Medhat
سيدي الفاضل انت برضه بتديين علم الاثار انا لي بالتعريف الأكاديمي اللي انت درسته في الكلية,؟ القر’ن مش كتاب تاريخ ولا كتاب جيلوجيا وسياق الاية معرفة مصير الاقوام السابقة وما نزل بهم من عذاب زي قوم عاد وثنود وغيرهم, لكن هل باد القدماء المصريين أم دخلوا في المسيحية ثم أسلموا في فترات الحكم الإسلامي, معلش يا عمر الايات دي لا تنطبق علينا لان الشعب المصري حي لم يمت مثل عاد وثمود, عشان بس تعرف خطأ تديين النصوص, ودي المشكلة لو عالم اثار مسيحي او ملحد مع احترامي هو غير ملزم بتقديس القرأن نحن نقدس القران لأنه كتاب الله حسب فهمنا الاسلامي, لكن في 5 مليار غير مسلم لا يؤمنون بهم , وللاسف علم الثار هو غربي نحن كمصريين دورنا فيه لا يذكر اللهم الا سليم حسن وأحمد قدري ودكتور لبيب حبشي, نصيحة أخيرة يا عمر التزم بمنهج علمي التفكير الديني لا يصلح للعلوم لان البوذي والهندوسي هو كمان مقتنع بإن ديانته هي أفضل ديانة وهي طريق الخلاص عشان كده المنهج العلمي في التفكير حل تلك المعضلة, عموما اللي يريحك يا عمر!

Omar Elsanhoty
أنا لم أقل أن القُرآن كتاب تاريخ لكنه يُشير إلى أحداث حدثت في الماضي فمن خلال علم الآثار وما نجده فيما تُخرجه الأرض لنا مِن آثار يُعتبر ذلك تصديقاً لِما جاء بالقُرآن .. دلوقتي لو فيه واحِد بينكر وجود الفراعنة والأقوام السابقة اللي أهلكها الله وبينكر قصة فرعون موسىَ هنرد عليه إزاي بنفس دماغه وتفكيره؟؟!! مِن خلال علم الآثار وما وجدناه حتىَ الآن في هذا الصدد.

Omar Elsanhoty
إزاي يا فندم علم الآثار وعلم المصريات هدفهم في المقام الأول تتبع كشف آثار الأُمم السابِقة ومُقارنتها بِما جاء بالقُرآن " فبالتالي هي تأكيد لِما جاء بالقُرآن وتُثبت أنه كلام مُنزل من عند الله لأنه ذكر أقوام من آلاف السنين وإحنا بنلاقي آثارهم دلوقتي (فهذا يُعتبر تصديقاً لِما جاء)

على سبيل المثال ربنا سُبحانه وتعالى قال في سورة يونس الأية 92 (فاليوم نُنجيك ببدنك لتكون لمن خلفك أية وإن كثيراً مِن الناس عن آياتنا لغافلون)

وبما أن مومياء " جسد " فرعون موسىَ تُعتبر آثر فبالتالي هِنا في هذه الأية إشارة من الله إنه نجىَ فرعون بجسده علشان كثيراً من الناس عن الآيات غافلون فبالتالي لما يشوفوه مُنجَّىَ بجسده يتعظوا 

بالإضافة إلى الأية القائِلة في سورة الروم (قل سيروا في الأرض فانظروا كيف كان عاقبة الذين من قبل كان أكثرهم مشركين) فهُنا إشارة وخِطاب من الله عز وجل للرسول صلى الله عليه وسلم أي قل لهم يا محمد سيروا في الأرض ليعتبروا بمن قبلهم وينظروا كيف كان عاقبة من كذب الرسل " فلما نلاقي ناس بتنكر وجود الرُسُل وإحنا نيجي نلاقي آثار الأقوام اللي أهلكها الله اللي وردت عنهم إشارات بسيطة في القُرآن .. 
فبالتالي (يؤكد ذلك صدق القُرآن الكريم ويُزيدني يقيناً به لصدق ما جاء فيه ورأته عيني من خلال علم المصريات أو الآثار بوجه عام).

مزيد من التفاصيل عبر هذا الرابط ((هنا)) وعليه نترك الحكم للقارئ فيما حدث ويحدث  .. فهناك من يرى أنه لابد من إدخال الدين فى الأحداث التاريخية فلولا الدين ما كنا لنعرف أن النبى يوسف كان موجوداً في مصر وعاش فيها .. إلخ، ولولا الدين ما كنا لنعرف قصة فرعون موسي والعظة التى تؤخذ من تلك القصة .. وهناك من يرى أنه لابد من إبعاد الدين نهائياً عن التاريخ وقتل أى إجتهادات تتم فى هذا الشأن بدون أن نتفكر أو نحاول أن نبحث عن من هو فرعون موسي و من هو الفرعون الموجود فى عهد سيدنا يوسف ومن هو فرعون ذو الأوتاد ...إلخ من أحداث الأقوام السابقة، نترك لكم الحكم

عن الكاتب

Admin Admin

التعليقات



إذا أعجبك محتوى موقعنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد الموقع ليصلك جديدنا أولاً بأول ، ويمكنك إرسال رساله بالضغط على الزر المجاور ...

إتصل بنا

جوجل بلاس

المتابعون

فيس بوك

جميع الحقوق محفوظة

حراس الحضارة

2016