حراس الحضارة حراس الحضارة

آخر الأخبار

random
جاري التحميل ...
random

كيف نستطيع تأريخ الآثار المُكتشفة فى عهد الملك نعرمر

بقلم الآثارى عمر السنهوتى 
كيف نستطيع تأريخ الآثار المُكتشفة فى عهد الملك نعرمر

بإذن الله الفترة الجاية هنتناول مع بعض حاجة مُميّزة وجميلة هتخلينا نعرف نأرّخ أي آثر بيعود لأي فترة من فترات تاريخ مصر .. 
ألا وهي قراءة خراطيش ملوك مصر منذ الأسرة الأولى حتى نهاية عصر البطالمة 
ودلوقتي هبدأ بأول ملوك الأسرة الأولى وهو الملك نعرمر (nˁr mr)

الملك نعرمر هو مؤسس الأسرة الأولى وأول ملوكها وقائد آخر مراحل حرب التوحيد بين الجنوب والشمال ومن أشهر أثاره (الصلاية المعروضة في المتحف المصري – رأس المقمعة المعروضة بمُتحف الأشموليان بأكسفورد)

ودلوقتي اللي يهمنا هو جميع ألقاب وأسماء الملك التي ظهرت على الآثار المصرية وبنشوفها دلوقتي في الصورة اللي قدامنا .. و
قبل ما أتكلم عن الألقاب أحب ألفت نظر حضراتكم لحاجة مهمة جدا وهي الإطارات اللي بيُكتب جواها الأسماء الملكية وهي الخرطوش والسرخ وكنت ذكرتهم قبل كدا ولمزيد من المعلومات حول الخرطوش والسرخ والفرق بينهما إضغط هنا.

دلوقتي إحنا شايفيين قدامنا جميع أسماء وألقاب الملك نعرمر على مرحلتين:

المرحلة (1) وبنشوف ليها 5 أشكال كالتالي:
الشكل الأول: بنشوف الصقر حورس واللي بيُنطق باللغة المصرية القديمة (ḥr - حر) وجنبه السٍرخ اللي مكتوب جواه علامة على شكل سمكة القرموط وبتُنطق باللغة المصرية القديمة (nˁr - نعر) ومعنى اللقب (ḥr nˁr - حر نعر) حورس نعر (المعبودة نعر)

الشكل الثاني: بنشوف الصقر حورس واللي بيُنطق باللغة المصرية القديمة (ḥr - حر) وجنبه السٍرخ اللي مكتوب جواه علامتين العلامة الأولى بتُمثّل سمكة القرموط اللي بتُنطق باللغة المصرية القديمة (nˁr - نعر) والعلامة الثانية بتُمثّل أزميل وتُنطق باللغة المصرية القديمة (mr - مر) ومعنى اللقب (ḥr nˁr mr - حر نعر مر) حورس إزميل المعبودة نعر

الشكل الثالث: بنشوف الصقر حورس واللي بيُنطق باللغة المصرية القديمة (ḥr - حر) وجنبه السٍرخ اللي مكتوب جواه علامة بتُمثّل سمكة القرموط اللي بتُنطق باللغة المصرية القديمة (nˁr - نعر) وخارج السرخ بنشوف 3 علامات بتُمثّل أزاميل وتُنطق باللغة المصرية القديمة (mrw - مرو) ومعنى اللقب (ḥr nˁr mrw - حر نعر مرو) حورس أزاميل المعبودة نعر.

الشكل الرابع والخامس: بنشوف مرة الصقر حورس واللي بيُنطق باللغة المصرية القديمة 
(ḥr - حر) وجنبه السٍرخ اللي مكتوب جواه 3 علامات بتُمثّل سمكة القرموط اللي بتُنطق باللغة المصرية القديمة (nˁr - نعر) وأزميل وتُنطق باللغة المصرية القديمة (mr - مر) وبنشوف شكل بطة صُغيرة بتُنطق باللغة المصرية القديمة (ṯȝ - ثا) ربما بمعنى عدو فبالتالي معنى اللقب (ḥr nˁr mr ṯȝ - حر نعر مر ثا) حورس أزميل الألهة نعر قاهر العدو أو المُسيطر على العدو.

وفي الشكل الخامس نجد نفس الشكل لكن بجمع كلمة ثا إلى ثاو بمعنى أعداء فيكون اللقب (ḥr nˁr mr ṯȝw - حر نعر مر ثاو) حورس أزميل الألهة نعر قاهر الأعداء أو المُسيطر على الأعداء

أما فى المرحلة (2)
بنشوف لقبين كل واحد فيهم مكتوب جوة خرطوش الأول مكتوب جواه (mnỉ - مني) بمعنى المُثبّت أو المُخلّد والثاني مكتوب برضه جواه مني بنفس المعنى لكن هنا بنشوف علامة الصقر اللي واقف فوق حامل خشبي وده مُخصص الملك أو الأله.

بكدة أكون إنتهيت من سرد جميع ألقاب الملك نعرمر أول ملوك الأسرة الأولى وبإذن الله المرة الجاية هشرح ألقاب الملوك الأتية أسمائهم: 
(حورعحا - جر – جت – مريت نيت)

عن الكاتب

Admin Admin

التعليقات



إذا أعجبك محتوى موقعنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد الموقع ليصلك جديدنا أولاً بأول ، ويمكنك إرسال رساله بالضغط على الزر المجاور ...

إتصل بنا

جوجل بلاس

المتابعون

فيس بوك

جميع الحقوق محفوظة

حراس الحضارة

2016